ASLAN XALİDİ: “İRAN MÜXALİFƏTİ HAZIRKI HAKİMİYYƏTİN DƏYİŞMƏSİNİ İSTƏYİR, MOLLA REJİMİNİN YOX”

Güney Azərbaycan türkləri İran müxalifətinə niyə dəstək vermir?

Dünən Azərbaycan Media Mərkəzində Azərbaycan Strateji Araşdırmalar Mərkəzinin təşəbbüsü ilə “Molla rejiminin dəyişilməsini istəyən Güney Azərbaycan türkləri İran müxalifətinə niyə dəstək vermir?” mövzusunda dəyirmi masa keçirilib. Mərkəzin rəhbəri Aslan Xalidi bildirib ki, 2006-cı ildə may hadisələri Güney Azərbaycan Milli Hərəkatının çox böyük uğurlara nail olduğunu göstərdi. Onun sözlərinə görə, bununla da cənubda oyanış hərəkatı başa çatıb: “Güney Azərbaycan türkləri öz hədəflərini bilir və dostunu, düşmənini tanıyır. 2008-ci ildə İranda baş verən yaşıl inqilaba güneyli türklər dəstək vermədi, baxmayaraq ki, inqilabın lideri milliyyətcə azərbaycanlı idi.

Güney Azərbaycan xalqı bu gündə İranda rejim əleyhinə keçirilən aksiyalara dəstək vermir. Bunun da əsas səbəbi İran miüxalifətinin liderləri qeyri-fars millətlərinin milli hüquqlarını açıq şəkildə dilə gətirə bilmirlər. Güney Azərbaycan o vaxt prosesə qoşular ki, müxalifət İranda yaşayan başqa xalqların pozulan hüquqlarını dilə gətirsin, bu ölkənin gələcəyinə yönəlik aydın proqrama malik olsun, inqilabdan sonra ölkənin siyasi düzəninin, quruluşunun necə olacağını söyləsinlər”. A.Xalidi qeyd edib ki, İran müxalifəti hazırkı hakimiyyətin dəyişməsini istəyir, molla rejiminin yox. O, buna görə də Güney Azərbaycanın “saray” çevrilişlərində iştirak etməyəcəyini diqqətə çatıdırb: “Hakimiyyətdə Xamneyi-Əhmədinejad cütlüyünü başqa bir molla əvəzləyəcəksə, İranda yaşayan başqa millətlərə qarşı irqsi siyasət davam edəcəksə Təbriz bu inqilaba dəstək verməyəcək”. “Türküstan” qəzetinin baş redaktoru Aqil Camal hazırda Güney Azərbaycan Milli Oyanış Hərəkatının passiv fəaliyyət göstərdiyini, lakin son hadisələrdən sonra hərəkatın aktiv fəaliyyət göstərməsinə ehtiyac olduğunu bildirib. Onun sözlərinə görə, Azərbaycanda yaşayan bir sıra insanlar Güneydə baş verən prosesləri kampaniya şəklində aparır: “Lakin bir müddət sonra bu proses dayanır. Hesab edirəm ki, bu doğru addım deyil və belə insanların bu proseslərdən yaranlanması doğru deyil. Bundan başqa bir məqamı qeyd edim ki, bizim respublikamızda yaşayan bir sıra narazı qüvvələr var ki, onlar istənilən tribunadan istifadə edirlər. Bu insanlar İranın “Səhər” televiziyasına müsahibələr verir və sair. Biz belə insanlara anlatmalıyıq ki, bu televiziyanın fəaliyyəti heç də ermənilərin bizə qarşı apardığı təbliğatdan fərqlənmir”. Son vaxtlar İranın Azərbaycana qarşı etdiyi təhdidlərin azalmasını ərəb ölkələrində baş verən inqilablarla əlaqələndirən Azadlıq Partiyasının sədri Əhməd Oruc bunun müvəqqəti xarakter daşıdığını deyib. Onun sözlərinə görə, İranda baş verən proseslərdən Güneydə yaşayan azərbaycanlılar istifadə edərək, təşkilatlanmalıdır. Güney Azərbaycan Milli Oyanış Hərəktanın Bakı təmsilçisi Ağrı Qaradağlı bildirib ki, güneylilər İranda demokratik müxalifətin olmasına heç zaman inanmayıb. O, İran müxalifətinin Güney Azərbaycanda yaşayan azərbaycanlıların hüquqlarının tanıması ilə bağlı hər hansı dəstək verdikləri halda, bu inqilaba dəstək olacaqlarını qeyd edib: “Güney Azərbaycan öz müqəddəratını təyin etmək hüququna malikdir və biz hər zaman bu istiqamətdə öz mübarizəmizi aparacağıq”.
BƏXTİYAR