- Bu sadəcə, ayıbdır. Fars şovinistləri əgər o televiziya və radionu əsarət altına alıb yalnız öz məqsədləri üçün istifadə edirlərsə, bu böyük nöqsandır. Yox əgər, buna ABŞ-da mediaya məsul dairələr özləri şərait yaradırlarsa, bu ciddi sualdır. Bunun qarşılığında isə xəbər yayılır ki, BBC-nin Azərbaycan bölümü bağlanır. Amma BBC-nin fars bölümünün verilişlərinə əvvəl 1 saat vaxt ayrılırdısa, indi səhv etmirəmsə, 5 saatdan çoxdur. Elə vaxtlar olur, İran adlanan ölkədə hadisələr aktivləşəndə 24 saat canlı yayım gedir. Azərbaycanla bağlı isə yarım saat. Niyə BBC bəyan edir ki, maliyyə çətinlikləri ucbatından Azərbaycan bölümünü bağlamaq istəyir? Görünür ki, fars düşüncəsinə malik olan varlı insanlar ya onlara təsir edib, ya da bu onların öz siyasətidir ki, Güney Azərbaycan üçün türkcə verilişlər verməsinlər. Demək burada kompleks bir iş vardır. İran adlanan ölkənin varlığını nə yolla olur-olsun, qorusunlar, orada yaşayan xalqların milli haqları gündəmə gətirilməsin. Ancaq orada yaşayan xaqların içərisindən seçilmiş şəxslərin simasında müəyyən yeniləşmə həyata keçirilsin. Bu, hazırkı Tehran rejiminin də strategiyasının tərkib hissəsidir. Amma Güney Azərbaycanda, eləcə də İranın hər yerində və bölgədə gedən siyasi proseslər bu planın nəinki əleyhinə çıxır, bu qədər maliyyə vəsaitləri xərclənməsinə baxmayaraq, həmin planı alt-üst edir. Biz ABŞ dairələrinə demək istəyirik ki, siz qorxmayın, Azərbaycan türkcəsində verilişləri dayandırmayın, qoyun, milli haqlarla bağlı orada fikirlər səsləndirilsin. Əgər bu zəmində yeni bir müxalifət yaranarsa, biz İranda demokratik recimin qurulmasında iştirakçı ola bilərik. Ancaq milli haqları tanıyan bir recimin.
- Bəlkə indi belə görünür ki, güney azərbaycanlılar bir qədər passivdirlər. Ancaq bir daha bəyan edirik ki, biz əvvəldən bəyan etdiyimiz siyasətdən əl götürməyəcəyik. Baxmayaraq ki, bizim şüarlarımız maddi və siyasi baxımdan xarici güclər tərəfindən dəstəklənmir, ancaq bu şüarlar o qədər güclüdür ki, yaxın zamanlarda yeni, gerçək müxalifətin yaranması qaçılmaz olacaq. Və İranı alova sürükləyəcək. Bu halda həmin xarici güclər geri çəkilib yeni strategiya müəyyənləşdirəcəklər. Ancaq bu strategiyanı indidən müəyyənləşdirsəydilər, nə yaxşı... Hazırkı recim çalışır ki, göstərsin, "yaşıl" müxalifət hərəkatın önündədir. Amma əslində "yaşıl" adlandırılanlar hərəkatın önündə deyil, hərəkatın önünə keçmək istəyir. Və milli haqların qarşısında sipərə çevrilməyi qarşısına məqsəd qoyub. Siz adınızı müxalifət qoymusunuzsa, bizim milli haqlarımızla bağlı konkret vədlərinizi verməlisiniz. O zaman Təbriz sizin çağrışınıza səs verəcək.
- Sizcə, "Yaşıl hərəkat"ın xaricdən də dəstəklənməsi, süni şəkildə inqilab yaratmağa və əsl inqilabı boğmağa hesablanmayıb ki?
- Biz düşünürük ki, süni şəkildə qabardılmış müxalifət nümayəndələrinə dəstək verilməməlidir. Əgər düşünürlərsə ki, bu yolla hazırkı recimi başqa ad altında qorumaq mümkün olacaq, bu yanlış qənaətdir. Əgər bu ölkədə yaşayan xalqların milli haqları verilərsə, hamı istəyər ki, qardaş kimi bir ölkədə yaşasın. Demokratik bir dövlət qurulacaqsa, biz güney azərbaycanlılar hər zaman iddia etmişik, yenə də bəyan edirik ki, Güney Azərbaycan İsrail dövlətinin təhlükəsizliyinə zəmanət verir. Və hamı bilir ki, terroru dəstəkləyən molla recimi ortadan qalxandan sonra, ölkənin əsas əhalisi olan Güney Azərbaycan türkləri imkan verməyəcək ki, xalqın çoxsaylı problemlərini bir kənara qoyub, külli miqdarda vəsaiti aparıb başqa istiqamətlərə xərcləsinlər. Ona görə də mən iddia edirəm ki, İranda xalqların milli haqlarının gündəmə gəlməsi İsrail xalqının mənafeyi ilə üst-üstə düşür. Və İsrail xalqının təhlükəsizliyini təmin edir. Çünki, hitlerçilik düşüncəsini daşıyan, hitlerçilik libasını geyinmiş bu recimin iddiaları göz qabağındadır. Və bu recmmin İsrail xalqının başına ikinci soyqırımı gətirmək niyyəti var.
- Bu cür yanaşma Sizcə, Azərbaycan və ya müsəlman cəmiyyətlərində qıcıq yaratmaz ki?
- Mən hətta deyə bilərəm ki, molla recimi Fələstin xalqını öz girovuna çevirib. Və Livan xalqını girovuna çevirmək istəyir. Azərbaycanda bəzi insanları meydana çıxarıb, Azərbaycanı girov çevirmək istəyir. Onlar Tanrı təfəkkürü ilə yox, dini siyasətə alət edərək öz maraqlarını güdürlər. Onun dostları var, Ermənistan, erməni lobbisi var, Rusiya var, Çin var. Mən bir qeydi də vurğulamaq istəyirəm ki, Azərbaycan Respublikasının müstəqilliyinin qorunub saxlanması da İsrail dövlətinin maraqlarına uyğundur. Niyə? 9 milyon Azərbaycan türkünün arxasında duran və İsrail dövlətini hədələyən bir ölkənin vətəndaşları olan 35 milyon Azərbaycan türkü var. Və bu 50 milyonluq gücdən ilham alaraq son vaxtlar bir sıra mesaclar səsləndirildi. Bu da İranın Azərbaycanla bağlı müdaxilələrini müəyyən qədər cilovladı. Bu, Güney Azərbaycanın gücünü göstərir. Bu gün İsrail hakimiyyətində İrandan və Rusiyadan getmiş adamlar var. Onlar gəldikləri ölkələrin yox, İsrail xalqının mənafeyini güdməlidirlər. Biri fars dilini bilir, məsələlərə fars təfəkkürü ilə yanaşır, o biri də rus dilini bildiyi üçün rus düşüncəsi ilə hərəkət edir. Bu düşüncələr də bir-birinə yaxındır. Bu halda, biz deyə bilərik ki, hazırda İsrail hakimiyyətinin içərisinə Rusiya və İran lobbisi yeriyib. Ancaq onlar "İsrail xalqı sülh içərisində necə yaşaya bilər" planlarına uyğun hərəkət etməlidirlər.
Hiç yorum yok:
Yorum Gönder